بيان الأسرة:
أنقذوا محمد صلاح ونزلاء زنزانة 6 قديم قسم شرطة دار السلام.
محمد صلاح وزملائه بزنزانة 6 قديم بقسم شرطة دار السلام يتعرضون منذ الأمس للاعتداء البدني المبرح والتنكيل مما يجعل هناك خطورة كبيرة على حياتهم داخل القسم. وبناءا عليه نطالب كافة الجهات المسؤولة أن تتدخل فورا لوقف ما يحدث مع محمد صلاح وزملاؤه وفتح تحقيق مع المسؤولين عن هذه الاعتداءات، كما نطالب بعرض المحبوسين قي هذه الزنزانة على النيابة لسماع أقوالهم فيما يتعرضون له وعرضهم على الطب الشرعي لمناظرة الجروح والاصابات التي يمتنع القسم عن تقديم اي رعاية صحية لها.
بدأت الحكاية مع إخلاء سبيل صلاح من قضيه ٤٨٨ في شهر يوليو، بدأنا رحلة الترحيل من قسم الخليفه لقسم دار السلام التابع له، ومن يومها واحنا أسرة محمد صلاح مواظبين علي زيارة القسم لمعرفة الاوراق المطلوبه وأسباب عدم تنفيذ قرار الاخلاء .
لحد في يوم عرفنا ان محمد بيتعرض علي نيابة امن الدولة وبيتدور وبيفتتح قضية جديدة برقم ٨٥٥. الخبر كان كالصاعقة بعد ما أملنا كان انه خلاص هيخرج، ومن يومها وهو في القسم مترحلش للسجن.
احنا كحال كل أهالي المعتقلين مش بنزور ومشوفناش محمد من شهر مارس بدأنا بتقديم طلبات للزيارة وشكاوي لمجلس الوزراء لحد ما جلنا الرد في٢٨ ديسمبر اننا نقدر نشوفه وبالفعل والدي ووالدتي زاروا محمد لمدة دقيقتين داخل القسم وشكرنا ربنا انهم شافوه .
بعد نجاح المحاولة بدأ باقي أهالي المعتقلين بتقديم الشكاوي لمجلس الوزراء لمحاولة زيارة أبنائهم وبناء عليه بدأنا رحلة التكدير في الزيارات بمنع كل ما هو مسموح وسوء المعاملة والطريقه عشان تبقي تشتكي كويس.
لحد زيارة امبارح الجمعة اتفاجأنا بانهم مانعين زيارات السياسيين والسبب مجهول والرد اسأل الظابط ومع السؤال الرد كان "احنا سامحين بالاكل من بره وده كان تساهل مننا عاوز الرسمي فهو انهم ياكلوا الجرايه وده اللي هيحصل" قولت تمام المهم انه محدش يأذيه، كان الرد "متقلقش لسه مماتش" الرد كان مخيف لدرجة اننا خرجنا نحاول نعرف اي معلومة عنهم من جوه القسم او من حد في زنزانة جنبهم لحد ما عرفنا امبارح ان في حفلة ضرب واعتداء بدأت الساعة ١١ ص لحد ٣ عصرا بدأت بتجريدهم من ملابسهم وتعليقهم في الفلكة والضرب بشوم ومواسير مياه وتجريد الزنزانة من الفرش وتغريقها بالمياه ومنع الاكل او التعامل معاهم.
١٤ محبوس مضروبين ومرمين بدون ملابس علي بلاط غرقان مياه وجروحهم بدأت في الالتهاب والسبب ان اهاليهم مقدمين شكاوي لمجلس الوزراء للزيارة.
اخويا والمحبوسين معه في زنزانة ٦ بيموتوا حرفيا من غير ما حد يسمع عنهم الضرب والاعتداءات ممكن تبقي شغاله حتى اللحظة دي، محمد صلاح وغيره حياتهم في خطر، وكل ما نطلبه أن يعرضوا علي النيابة لسماع اقوالهم وعرضهم علي الطب الشرعي..
سوف نتقدم غدا بشكاوى إلى المجلس القومي لحقوق الإنسان ومجلس الوزراء ولجنة حقوق الإنسان بوزارة الداخلية وبنطلب من كل شخص يقدر يساعد في إيصال صوتنا ووقف ما يتعرض له صلاح وزملاؤه بقسم شرطة دار السلام أن يتدخل فورا.